Ons verkoper bied die volgende aan:
Binne veeplaas te koop geleë in die Groen Kalahari, rondom Groblershoop distrik met sagte rooi grond en harde bossie veld, Kameeldoring en Witgat bome. Verskeie kampe groter en kleiner, met water vir vee en / of wild. Die habitat is geskik vir bees, skaap, boerbokke, wild en eko-toerisme. Hier is goeie infrastruktuur en die verbeteringe is ‘n welkome gesig soos onder andere die ruim onthalers woonhuis met sonkrag.

Die volgende wild kom in klein hoeveelhede voor op die plaas: springbokke, gemsbokke en trek kudus asook klein wild en vlakvarke.

Die plaas is basies ? gerieflike “instap-en-boer” plaas, waarmee tot met 140 grootvee of 840 kleinvee of natuurlik enige kombinasie daarvan tesame met wild geboer kan word. Met betrekking tot die weiding, word daar verantwoordelik ten opsigte daarvan geboer, en mag die foto’s dalk nie die huidige stand reflekteer nie. Vra gerus indien u verder wil weet. Wat die boerdery betref, word lekker en maklik geboer. Hier is voerkrale, werkskrale en opvangs krale by die vee poste aangebring wat die kleinvee opvang maklik maak. Genoeg krale is beskikbaar om te roteer, en verskillende groepe by mekaar te sit.

By die huis is daar kampies, waar die ooie met lammers gedurende lamtyd in gesit word en gevoer word tot speentyd. Wanneer die ooie weer uit gaan veld toe, kan die lammers in die kraal agter bly. Hier is vele kampies om die diere te sorteer, asook ‘n drukgang en laaibank.

Op die plaas word tans hoofsaaklik met bees, en skaap geboer, en is hier dus goeie werkskrale en laaibanke daarvoor beskikbaar. Die binneplaas is ‘n eenheid en word nie onderverdeel deur enige paaie of so nie. Twee van die kampe lê lekker afgesonderd met pragtige uitsig oor die res van die plaas en ‘n 4x4x word benodig om daarbo by dit uit te kom, terwyl die oorblywende kampe, (ook binneplaas) maklik van die opstal af met ‘n ryperd, ysterperd of bakkie geboer kan word.

Op die plaaswerf is daar ook nog verder hokke waar die hoenders, kapokkies en duiwe aangehou word.

Hier word lekker en gerieflik gebly. By die huis op die werf is die lekkerste plaas swemdam, waar jy heerlik kan afspoel en afkoel na die dag se werk.

Die groente tuin is met skadu net oorgetrek en daar word geplant net waarvoor daar lus voor is, van ‘n aarbei tot ‘n mielie. Met die net word ook die vlieende gaste darem redelik beheer.

Die ruim spasie in die huis is baie gerieflik en die afwerking mooi en nietjies. Die kombuis, eetkamer, en sitkamer is ‘n gesellige oop plan, met die lapa en binne braai area net by die kombuis uit. Wanneer daar hier kos gemaak gaan word, gaan geen geselligheid en lekker kuier gemis hoef te word nie – almal is heeltyd deel van die geselskap.

Die kamers is net so ruim met goeie kaste en omtrent spasie vir alles. Die badkamers is pragtig met ‘n bad en stort.

Hou asb ingedagte dat die foto’s geneem is met die lysting, en dat boerdery normaal voortgaan en dus kan die situasie op die plaas en die foto’s moontlik in van die kampe effe verskil oor die winter voor die reën seisoen aanbreek.

Wat die plaas uniek maak is die volgende: dit is ? binne plaas, met geen publieke roetes nie, die plaas boer lekker en maklik, weiding word te alle tye goed bestuur, voldoende water, die hekke, binne drade en grens drade is in werkende toestand. Sommige binne kampe is jakkalsproef omhein of geëlektrifiseer. Goeie infrastruktuur soos ? pyp beeskraal kompleks met laaibank, drukgang en kopklem, krale vir kleinvee rondom die opstal. Gehalte verbeteringe soos die sinkstoor en gerieflike opstal met verskeidenheid buitegeboue.

• Die plaas is opgedeel in 9 kampe, elkeen met suipings.
• 6 Boorgate
• 3 Windpompe
• 2 Sonpompe
• 1 Dompelpomp
• 5 Damme
• 2 Grond damme (tans droog)
• Veldkrale
• Pypkraalkompleks met krale wat ± 100 bees kan huisves
• Drukgang, kopklem, laaibank vir 'n vragmotor asook 'n beeswaentjie, sinkhuis om beeslek in te stoor, en suipings punt.
• Afdakke
• Sinkstoor
• Arbeidershuise
• Markte en koöperasies is so 20 km van die plaas geleë.

HABITAT:
Drakrag: ±140Grootvee, Gemiddelde GVE is 28ha per GV, KVE is so 5 ha per KV,
Topografie: Die hoogste punt is 1200 meter en die laagste punt is omtrent 980 meter.
Klimaat: Die gemiddelde maandelikse maksimum en minimum temperature is sowat 42°C en –4.0°C vir Desember en Julie respektiewelik.
Reënval: Die langtermyn gemiddelde reënval per jaar is 200mm.
Water: Ondergronds, Reënval,
Ongediertes: Jakkals, Rooikat,
Bome: Kameeldoring, Lemoendoring, Witgat
Struike: Swarthaak, Brosdoring,
Klimaks Gras: Bloubuffelsgras, Ghagras, Langbeenboesmangras, Kortbeenboesmangras, Rondompol
Sub-Klimaks Gras: Blinkaarboesmangras,

BELANGRIKE NOTA:
Alhoewel alle voorsorg getref is om die inligting korrek aan te teken, kan daar natuurlik die
moontlikheid bestaan dat iets wel nie heel korrek aangeteken is nie weens ? misverstand of
onduidelike weergawe aan die agent. Daarom word u versoek om u self met die inligting te vereenselwig om sodoende moontlike onskuldige foute te vermy. Geen verantwoordelikheid sal deur die agent aanvaar word vir inligting wat tot misverstande en onskuldige foute lei, in die voorafgaande, of a.g.v die voorafgaande inligting nie. Read more...